وانا قاعدة باسمع الاطلال لأول مرة في حياتي لقيت هاموشة صغيرة اوي طايرة في خط مستقيم في اتجاه وشي في محاولة لاختراق عيني على ما اظن.. رحت حطيت ايدي بينها وبين وشي فحسيت ان الفراغ بينا/ الهوا عمل زي فيلم ماتريكس حلقات متتالية من الاكبر للاصغر بشكل متسارع وواضح للعيان.. ففتحت المدونة بسرعة عشان اسجل اللحظة التاريخية قال يعني بادون وكده. كنت هاكتب عن صراعي مع هاموشة ممكن تكون دورة حياتها خلصت خلاص وهاجيب في سيرتها بكلام لا يصح. تخيلي؟
للدرجة دي ممكن اوي تكوني فارغة من جواكي وتسيبي عمرك يعدي بين الحوض وترتيب السرير..تخيلي اني مرة فكرت اكتب مقالة عن ان صابون فيري احسن كتير من صابون بريل نمرة واحد في مصر؟ يالهوي!!!
القاعدة في البيت بتخلي المخ يقف.. اه والنعمة! بعد الجواز ماتقعديش في البيت ولا باختيارك ولا باختيار الزوج ولا حتى بأمر الدستور الجديد :).. مش باقولك اتخانقي مع جوزك..نو.. ابسولوتلي.. اتناقشي وصممي على موقفك ضمن حدود المناقشة وانزلي اشتغلي ايا كانت الاعتراضات وحدتها :)).. القعدة في البيت ببساطة هاتخليكي شلتة.. دمك تقيل..لتاتة.. بتاعة حوارات.. دماغك فاضية..محبطة.. بتاعة مسلسلات تركي .. وهاتقرفي جوزك قرف السنين كلها.. وبعدين رغم ان الاطلال عظيمة إلا ان هل رأى الحب سكارى هي احلى مقطع... الموسيقى بترقص وبتنسيني الهاموشة الله يرحمها.
قاومي وافضلي اشتغلي.. خليكي حريصة جدا على علاقاتك الاجتماعية كلها زي ما هي.. مافيش كلام فارغ من ان لازم تبطلي تكلمي رجالة سواء الاصدقاء القدامى او الزملاء وتغيري رقم موبايلك بقى والشغل ده لأن دي مراهقة متأخرة لا تليق بحياة زوجية قائمة على الاحترام والمشاركة.. قاومي وماتسرحيش كتير في عدم جدوى اعلانات الاريال لأن ببساطة برسيل احسن منه بمراحل خاصة برسيل جل رغم ارتفاع سعره نسبيا عن ما شابهه.
قاومي وانزلي كل يوم تفاعلي مع الطبيعة والناس والمواصلات والتراب واسمري من الشمس لان هي دي الطريقة الوحيدة لبقائك حلوة كده ودماغك صاحية وعلى دراية مثلا بأخر المستجدات في الموضة والمحلات والحاجات اللي احنا كلنا بنحبها ايا كان وضعنا الاجتماعي والمادي.
يمكن اكون هنا دمي تقيل وسخبفة وفقيرة في كلامي وممكن كمان في الامثلة اللي باضربها.. انا دلوقتي وصلت لـ فان الحظ شااااااااء... ايه ده دي الاغنية خلصت.. ما علينا.. انتي شايفاني كده عشان انا بقالي 3 سنين مرزوعة في البيت ! :)
No comments:
Post a Comment