عندكوا كبده وسجق؟

في احدى ليالي الصيف الرطبة جلسنا في ملل، نريد ان نأكل، ونعرف لو طلبنا "دليفري" من أي مطعم لن يأتي لأننا من قاطني الاحياء السفلى في القاهرةذات مرة اتصلت لأسأل عن كونهم لا يأتون لنا بالطعام رغم اننا "بني آدمين برضه" فقال لي الشاب ذات الصوت الرخيم عبر الاسلاك "ان الموتوسيكل بيتوه"طلبت احد المطاعم الشهيرة 19019
"مساء الخير يا فندم"
"ممكن اعمل اوردر من فضلك؟"
"رقم التليفون...........................، الاوردر ايه؟"
"4 طعمية و5 فول 3 بطاطس"
"بس احنا مش بنقدم الحاجات دي يا فندم"
"ازاي مطعم كبير زي ده ومش بتقدموا الاكل ده؟"
"يافندم احنا متخصصين في الفراخ"
"وايه اللي يمنع انكوا تقدموا الفول والطعمية جنب الفراخ؟"
"ماعندناش قسم للفول والطعمية"
"ما انا مش فاهمة ازاي تكونوا مطعم كبير كده ويكون ما عندوش اقسام كفاية؟"
"في مطاعم تانية متخصصة في الاكل ده"
"اه يعني انت بتطردني من عندك وبتقولي روحي المطاعم التانية"
"يا فندم مش موضوع طرد ولا حاجة بس احنا متخصصين في الفراخ وبس"
متجاهلة جملته الاخيرة "يعني انت بتعمل دعاية للمطاعم الأخرى على حساب المطعم اللي انت شغال فيه"ثم جاء السوبر فيزور "أي خدمة يا فندم؟""اه خد مني الاوردر ده من فضلك.......... ثواني.......... اه افتكرت ........... 4 طعمية و5 فول و3 بطاطس"
"احنا مش بنقدم النوعية دي من الاكل يا فندم احنا بنقدم فراخ وبس"
"وليه تقدموا فراخ وبس؟.... ليه مافيش فول وبطاطس؟"
"احنا ممكن نبعت لحضرتك بطاطس باكيت لكن فول وطعمية ما فيش"
"اه يعني انتوا متخصصين بس في البطاطس؟"
"لأ يا فندم احنا متخصصين في الفراخ"
"امال البطاطس بتعمل ايه عندكوا؟"
"احنا بنقدمها مع الفراخ"
"اشمعنى بقى؟؟؟؟؟؟؟؟"
فترة سكون قصيرة "بصي يا فندم انتي ممكن تتصلي بالرقم ده ***** وهناك هتلاقي فول وطعمية"
"اهااااا، يعني انتوا متخصصين في الفراخ والبطاطس وبس؟"
"ايوة يا فندم"
"طيب ليه بقى مش بتقدموا الفول والطعمية؟"
"اوعدك يا فندم اننا في المستقبل نقدم الاكل ده"
"طيب ولغاية لما يجي المستقبل اعمل انا ايه؟"
"ممكن تاكلي فراخ وبطاطس"
"اه يعني انتوا مش بتقدموا حاجة تانية؟!!"
"ايوة يا فندم"
"طيب هو المطعم اللي بيقدم الفول ده موجود جانبكوا؟"
"في فرع في نفس منطقتنا يا فندم وفروعه موجودة في القاهرة كلها"
"طيب خلاص ابعت حد من الدلفيري اللي عندك يجيب لي الاوردر ده لو سمحت"
فترة سكون اخرى
"بس ما ينفعش يا فندم.. الدليفري اللي عندنا شغال في المطعم ده وبس"
"يعني انتوا مش بتقدموا كل انواع الاكل رغم انكوا مطعم كبير وليه اسمه وكمان مش عايزين تخدموا الزباين بتعكوا؟"
"يا فندم احنا تحت امر حضرتك، بس ما ينفعش دليفري من عندنا يشتري لحضرتك اكل من مطعم تاني"
"اهاااا، نظام غريب واللهي!!!، طيب مش تقول كده من بدري بدل ما ضيعتوا وقتي معاكوا؟"
"احنا آسفين يا فندم"
" شكرا"
واغلقت السماعة وبعد دقيقتين اتصلت مرة اخرى
"................."
"ممكن اعمل اوردر؟"
"................................."
"خمسة كبده واتنين سجق من فضلك"

3/3/2009
http://www.facebook.com/note.php?note_id=55979755981