تمرد الطبقة وسط الوسطى

لسبب ما مش باحب اشتم بألفاظ أبيحة رغم اني اتولدت واتربيت وعايشة حاليا في مناطق شعبية، يعني الالفاظ دي هنا زي المية والهوا حاجة اساسية في الحياة ولسبب ما برضه باحس ان الكلمة
A7A
كلمة لطيفة وفي مواقف كتيرة لازم تتقال، ما ينفعش تستبدل بأي شئ آخر عشان كده ايام المدرسة الثانوية، اكتر فترة بيصيع فيها البني آدم ومسموح ليه بشوية انحراف، كنت بابدلها بـ "أوبجكشن" عشان ما كنتش باقدر اطوع لساني واقولها وفي نفس الوقت عشان اجاري الجو اللي حواليه. غريب انك تتربى في بيئة وتبقى منفصل عنها وكأنك جاي من كوكب تاني. دايما انا كنت الغريبة اللي لسه الطيارة منزلها على اول الشارع رغم انها عاشت فيه من سنين. امي سيدة ارستقراطية جدااا وانا صغيرة كنت باتخيلها اميرة جميلة جدا بفستان منفوش من فساتين القرن التمنتاشر وقعها حظها في ابويا اللي ممكن تقول عليه كان الحطاب في الحدوتة.
سيدة ارستقراطية رفيعة المستوى جدااا تتجوز راجل ابن بلد عصامي يفتخر انه اشتغل بياع بطيخ وعجلاتي وهو صغير وانه قدر يتخرج من معهد عالي رغم كل الظروف طبيعي جدا ان الناتج لازم هايكون انا. لحد قريب كنت عجينة صلصال مكونة من اخلاق رفيعة جداااا كانت بتمنعني من النزول لمستوى فرح حد من قرايب بابا في الشارع مثلا والرقص بهمجية وانا حافية على دفوف فرقة شعبية واغنية "البت بيضة بيضة بيضة... البت بيضة وانا اعمل ايه"
لسه لغاية دلوقتي الاغنية بتتردد في ودني والفرقة بتدق على الطبل والدف بعصبية قبل التطور وظهور ما يسمى بالدي جيه وانا واقفة على جنب، براوية ومش باكلم حد عشان طبعا مش عارفة اتواصل مع المستوى ده. وفي نفس الوقت مش عارفة اتواصل مع اصحابي في المدرسة الخاصة اللي كنت فيها واللي هما اكيد اعلى مني شويتين تلاتة سواء في المستوى المادي او المعيشي لاني مش عارفة اطلع لمستواهم ولان ماما مش بتعملي ساندوتشات لانشون فراخ وانا رايحة المدرسة ولاني مش بالبس خواتم دهب بابا جابهوملي من السوق الحر او وهو راجع من السعودية.
حتى جمالي، ولا هو جمال ارستقراطي متعالي نبيل زي جمالها ولا هو وش معجون بالتراب زي بابا، جمال مموه في منطقة وسط عجيبة مالهاش ملامح.
دايما كنت واقفة على السلم ولا عارفة اطلع ولا قادرة انزل، مش عارفة العب في الشارع زي العيال الصغيرة ولا باروح النادي زي زمايلي في المدرسة. احنا مش في نفس مستوى الناس اللي حوالينا في العيلة او في المنطقة ولا احنا في نفس مستوى زمايلنا في المدرسة والجامعة والشغل. احنا كيان مشوه لحاجة كان نفسها تكون بس ماكانتش.
اقدر دلوقتي اقول أوبجكشن بلغتها الاصلية؟؟ رغم كل الالفاظ اللي احنا عايشين في وسطها ليل ونهار اللي جاية من المنور والشارع والتوك توك والميكروباص الا اني لو تلفظت بلفظ "جزمة" مثلا كشتيمة اكيد بريئة في وسط مهرجان الانحدار الانساني ده هاتديني امي درس في الاخلاق والادب ومش بعيد تقعد تعيط عشان ماعرفتش تربيني كويس !!