في البحث عن سبب لأكتوبر

اكتوبر از ماين

دايما اكتوبر، رغم انه مرتبط بدخول المدارس وانا كنت باكره المدرسة، الضفيرة والشريطة البيضة والشراب ابو استيك اللي واصل لتحت الركبة ولبس المدرسة الكحلي اللي بسببه مش باحب اللون الكحلي لغاية دلوقتي

اجواء الفصل دايما كانت سخيفة، الديسكات واللي فوق الديسكات والمدرسين والكشاكيل....اوووووووووووف

عمري ما حبيت المدرسة وعمري ما كرهت اكتوبر

يمكن عشان اتولدت فيه؟ بس ولادتي مش من دواعي سروري ومش من اسباب ابتسامتي الكتيرة، ولادتي حدث مش كبير في حياتي خاصة لما باحس اني لسه ما اتولدش بجد

يمكن عشان ايام الجامعة؟ ايام الجامعة دي قصة تانية خالص

سبتها كده تعدي من ايديه ومعشتهاش كما ينبغي ان تعاش واتألمت قوي في اول اكتوبر بعد التخرج عشان اربع سنين ماتوا بين ايديه من غير اي محاولة لانقاذهم

اعتقد جديد انك تعرف حد ساب المدرسة والجامعة من غير اي اصحاب، يمكن اتنين بس اللي استحملوا يفضلوا من الايام العجيبة دي اللي كانت بدايتها دايما اكتوبر

ياااااااه اكتوبر... لما الهوا يبتدي يبقى ساقع وابتدي اتغطى وانا نايمة وابص في السقف واحلم بأول حد حبيته، مين قال ان الحب في الصيف بيكون اقوى؟ هو في حد بيعرف يحب في الحر والعرق ده؟

اكتوبر لما ابتدي اتوقع المطر واخد بعضي اخر النهار واروح امشي جانب عمارته يمكن الاقيه نازل منها مع مراته، ما هو اكيد دلوقتي اتجوز مش معقول بعد كل السنين دي لسه حياته زي ما هي، وادور على كابينة النيل اللي كانت على باب الجامعة واللي كنت باكلمه منها بعد ما اخصم 5 جنيه من مصروفي تمن الكارت

بس ليه اكتوبر وهو بيفكرني بكل حاجة مش حلوة؟ يمكن عشان اختي اتولدت فيه؟ توأمي لو عايزين اكون دقيقة، فانا وهي مولودين في نفس اليوم ونفس الساعة ويمكن نفس الدقيقة بس بينا 6 سنين

يمكن عشانها باحب اكتوبر، رغم اختلافنا عن بعض ورغم تنبائنا اننا لازم هانعيش بعيد وهايجي يوم ونتوه

يا دي اكتوبر اللي بيوجع قلبي كل ما بيجي وبيفكرني اني هاتم 25 سنة باكره منهم 24

مافيش عندي سبب واضح اقدر اشاور عليه واقول عشان كده باحبه، مين قال ان لازم يكون في اسباب للحب؟