مصر "التي" لنا

بقالي شوية حلوين كده بادور على مكان هادي اقضي فيه يومين بعيد عن ضغط الشارع المصري والاخبار السياسية. ركزت مع المواقع الالكترونية المخصصة للعروض  والتخفيضات زي دير اند ديل وأوفرنا. بيقدموا عروض هايلة وبأسعار مناسبة. المواقع دي بتكون مقسمة العروض بتاعتها تحت بنود زي سفر وسياحة، والكترونيات، ومطاعم وهكذا وانت بتختار البند اللي يهمك وتتسوق من خلاله. في مرة دخلت على الصفحة الرئيسية لقيت عرض  لسهل حشيش بالغردقة  مستخبي في صفحة داخلية، المفروض يكون تحت بند السفر بس هو مش موجود هناك في سابقة الاولى من نوعها، وانا متابعة جيدة للمواقع دي.

ايه هو سهل حشيش؟ ده مكان يبعد عن الغردقة بحوالي ساعة. المكان تم بناءه وتأسيسه ليكون مناسب للأثرياء، منتجعات من الدرجة الاولى العالمية، ملاعب جولف، ملاعب تنس، سمعت ان في مدينة فرعونية تحت الماء تعتبر الأولى من نوعها لهواة الغطس، مارينا لسياحة اليخوت اللي هي اغلى انواع السياحة في العالم وكمان في بقى كوبري علوي بداخل حدود البحر ويصل إلى بعد 250 متر وده انا مش عارفة يعني ايه بس واضح انها حاجة فخيمة.

ايه هو العرض بتاع سهل حشيش بقى: جناح صغير فاخر مكون من ريسبشن صغير وغرفة نوم ومطبخ وحمام. الجناح بيبص على حمام السباحة وبيشوف البحر، المكان ده بـ 4000 الاف جنيه وطبعا لظروف البلد والاحداث الساخنة اضطروا يعملوا تخفيض يصل الى 900 جنيه لمدة 3 ليال اربع ايام بالمبيت فقط. طبعا العرض وهمي والمكان ده في ظروف طبيعية ماكناش نحلم اننا نعدي من جنبه اساسا.

اراضي البحر الاحمر، اللي من ضمنها سهل حشيش، اكتر ارض اتسرقت يمكن في التاريخ.. تم بيعها ايام النظام السابق المتر بدولار واحد أو اكتر من كده بحاجات بسيطة لرجال اعمال من جنسيات اخرى، ده غير طبعا رجال الاعمال المصريين الهمام.

بعد الثورة طبعا مافيش اي حاجة اتغيرت والاخوان اللي هما الحزب الحاكم حاليا 

مشغولين في الهيمنة على مؤسسات الدولة فمش فاضيين لأي حاجة تانية اطلاقا. لكن مش هاننكر يعني ان السياحة الداخلية انتعشت شوية على الاقل بالنسبة لي وبالنسبة لكل من حولي بسبب ان اسعار الفنادق في النازل بسبب الاحداث. وده مكتسب لو تعلمون عظيم زي اسعار المانجة كده لما انخفضت وبصراحة أكلت مانجة السنة دي عمري ما اكلتها في حياتي ولا في الكم ولا في النوع.

كلنا نعرف، اتعرضنا شخصيا او سمعنا، عن معاملة المصريين في شرم الشيخ او البحر الاحمر قبل الثورة وازاي كل مصري مش ابن كلب، اقصد مش ابن ناس بالنسبة لهم، بيتم  التعامل معاه على انه حاجة حقيرة جاية تلوث المكان ابتداءا من ظباط الداخلية الحلويين الى الناس اللي شغالة هناك في السياحة وبتعيط حاليا على كم الخسائر بعد الثورة. احب اقولك ان الاسعار انخفضت ده حقيقي وفي مقدورك تروح شرم والغردقة وفي فنادق 5 نجوم كمان بأسعار هبلة لكن المعاملة السيئة مازالت موجودة وكأننا حشرات. لازم تكون تنك وبتدي على الدماغ من تحت لتحت. طبعا ده ماحصلش معايا لما كنت في الغردقة من كام شهر عشان انا باعرف للأسف اتنك كويس لكن المعاملات السيئة موجودة من المصريين اللي شغالين هناك ومستمرة عادي جدا.

المهم انا لفت نظري بقوة ان عرض سهل حشيش اياه مستخبي ومش تحت بند سفر في الموقع بتاع العروض ودي رسالة دلالتها انهم مهتمين جدا ان العرض لا يتم طرحه قدام كل الناس عشان ما تجيش عامة الناس تلوث المكان رقم واحد في السياحة العالمية، المكان المخصص لسياحة الاثرياء وملاعب الجولف ومراكز الغطس وكده بقى.

الجدير بالذكر ان اهل الغردقة نفسهم اللي هما جيران شارع شيري اشهر شوارع الغردقة السياحية وجيران مارينا اليخوت وجيران الهنا متبهدلين. الاهتمام هناك بالمناطق السياحية بس يعني شارع سياحة وراه حي شعبي لا تصل اليه المياه الصالحة للشرب مثلا. مش بس كده قامت المحافظة ببيع جميع الأراضي الواقعة على شاطئ البحر مباشرة وحرمان سكان المدينة من التمتع بشواطئ المدينة والتي تملكتها الفنادق والقرى الخاصة وقامت بفرض رسوم مرتفعة جدا من أجل السماح بالوصول إلى الشاطئ أو منعت سكان المدينة من الوصول إليه بالمرة. ويعتبر عدد الشواطئ العامة بالمدينة زهيد جدا ولا يتناسب مع طول ساحل المدينة ولا مع عدد السكان، دي حتة كوبي بست كده.

بس في الحقيقة ده مش بس في البحر الأحمر، عندنا مكان زي الاسماعيلية مثلا اللي محتلها شركة قناة السويس وواخدة افضل شواطئها ومانعة دخول الغير عاملين في الشركة اليها وكأننا جربة مثلا. وطبعا الشواطئ العامة قذرة قذارة الخفافيش الليلية.  بس ده موضوع تاني هابقى احكي عنه بعدين في بوست اخر.

الحقيقة ان الفساد وصل للركب وان الثورة عرت كل اللي كانوا فاكرين نفسهم متغطين وبينت اد ايه مصر عمرها ما كانت لنا ابدا. المهم انا قلت انشر العرض الجهنمي الرهيب واقولكم روحوا استمتعوا بشواطئ سهل حشيش، استمتعوا بتخفيض يصل الى اكتر من 3000 جنيه. روحوا نكدوا على الاثرياء اللي سرقونا بقلوب متحجرة وماكنش في حد منهم عنده ضمير يقول لأ حرام او يا عيني المصريين المفروض ما يتعملش معاهم كده. انا كنت باقول طيب يفتحوا الاماكن دي للعامة ويحطوا قوانين بقى للنظام والنظافة، قوانين جامدة شوية، بس دلوقتي باقول لأ.. قولي لجارتك او زميلتك ام محمد في الشغل خليها تاخد حلل المحشي وتروح تقعد على الشاطئ الباهظ.. نكدوا على اللي خلفوهم، اقرفوهم وخدوا معاكوا بطيخ وارموا لبه في البحر.. باختصار استمتعوا :)