Monday, May 3, 2010

نصيحة للقطة



احنا كمصريين اواريب عارفين كل حاجة ودماغنا دايما صاحية لازم نشتغل ناصحين ونوزع النصايح على الناس اللي حوالينا من وقت للتاني ونبين اننا لا مؤاخذة.. فاهمين الفولة

بعد الجواز يا قطة (القطة اللي هي الزوجة طبعا) هتلاقي كل من هب ودب بيسأل في كل حاجة وفي اي حاجة واوقات ببجاحة رائعة عن كافة شئ يخصك انتي لوحدك

هتلاقي بعد الفرح واحدة بتغمزك، "واحدة" بس كده عشان ممكن قوي تكوني ما تعرفيهاش لدرجة انها تغمزلك
الواحدة : ها؟
وابتسامتها من الودن للودن وبتغمز بعينيها كأنها عندها شلل رعاش

القطة اللي هي انتي: ايه؟
ببراءة شديدة طبعا

الواحدة: ايه الاخبار؟

القطة: اخبار ايه؟

الواحدة ونوبة الشلل زادت: عملتوا ايه؟

القطة وقد بدأت تستهبل: في ايه؟

ممكن الحوار يفضل كده ربع ساعة، الواحدة مش بتزهق والقطة مش عارفة تهرب ازاي من سيل الاسئلة اللي نازل على دماغها، في الحالة دي اعملي عبيطة جدا واستهبلي لاقصى درجات الاستهبال وطولي الحديث لنص ساعة كمان كتدريب على اسئلة واحدات اخريات

بعد الجواز بكام اسبوع مثلا، تيجي واحدة تانية مش قريبة الاولانيين، لان غالبا الحوار اللي فات بيتكرر على كذا مرحلة وفي اكتر من اتجاه ومع اكتر من واحدة

الواحدة وهي مش قاعدة على بعضها: ها؟

القطة: ها ايه؟

الواحدة بخبث فذيع: مافيش اخبار؟

القطة وهي هتفطس من الضحك: اخبار ايه؟

الواحدة بزهق: مارجعتيش؟

القطة: اه رجعت امبارح

الواحدة: بركة بركة، استريحي بقى وبطلي تتنطتي كتير وبلاش تقفي في المطبخ، ابقى اقلي بيضة وخلاص

القطة: ليه؟

الواحدة: عشان الموضوع يكمل

القطة: موضوع ايه؟

الواحدة: الحمل يا حبيبتي

القطة: مين قال اني حامل؟

الواحدة: ما هو باين عليكي اهو، وشك مسفر ورجعتي امبارح

القطة: بس انا مش حامل يا طنط، لما احمل هابقى ابلغك

وتنزل طنط من عندك وتنشر الخبر في ارجاء المعمورة، وتلاقي الدنيا كلها عرفت انك حامل بس مخبية ومش عايزة تقولي، وانتي اصلا رجعتي لاسباب تانية بتؤكد عدم حملك وبقى المفروض عليكي انك تمسكي ميكرفون وتمشي في البلد نقولي انك مش حامل ومش حامل ليه
!!!

بعد الجواز بقى بكام شهر

الواحدة: عاملة ايه يا حبيبتي؟

القطة: كويسة

الواحدة بحسرة: صحتك حلوة يعني؟

...... :القطة

الواحدة بحسرة اكبر وهي بتفليكي بعينيها: مافيش دوخة، مافيش ترجيع

القطة: لا مافيش

الواحدة: ربنا يرزقك يا اختي ويبرد نارك

وهي اصلا اللي قاعدة على نار ودماغها عمالة تودي وتجيب

شوفي يا قطة، الاحسن انك تخربشي على طول وتضيقي عينيكي عشان تخلصي نفسك من الافلام العربي اللي هاتتخرج عليكي وهاتبقي انتي البطلة غاص بعنك، خاصة مع الواحدات اللي بيخبطوا على الدولاب بتاع اوضة نومك عشان يعرفوا نوع الخشب ايه قبل ما يربعوا فوق الانتريه ويبدأوا التحقيق، انا نصحتك وبريت ذمتي منك وما تنسيش تشتري مبرد حامي لزوم الخربشة

2 comments:

  1. ههههههههه
    صحيح انتوا عملتوا اية؟؟
    وانت مش حامل ليه؟؟ وحامل لية؟؟
    وجبت بنت يا عيني يا رب تخاويها وجبت ولد معلش اللي مجابتش بنت ما جابتش هي اللي تشيلك في كبرك؟؟
    :))
    ها تدخلي ابنك انجليزي الفرنساوي اشيك
    فرنساوي لا انجليزي افيد
    ها تعزلي ليه اشتري عربيه احسن
    اشتريتي عربية "بحقد وغل" ما كنتي تعزلي احسن
    استمري حياتي كش عاوزين تكبروا وتتجووزا اشربو ا بقي
    :D:D
    المزيكا حلوة اوي

    ReplyDelete
  2. يعني السلسة دي مش هاتخلص قريب؟
    وانا اللي كنت فاكرة ان اول ما ابقى حامل الموضوع هاينتهي
    ربنا يطمنك يا مون
    :D

    اذا كان ذوق الموسيقى حلو فاحنا بنتعلم منك يا فندم

    ReplyDelete